పశ్చిమాసియాలో ముదురుతున్న సంక్షోభం.. ఇరాన్‌ సైనిక స్థావరంపై అమెరికా ముందస్తు దాడులు!

పశ్చిమాసియాలో ఉద్రిక్తతలు మరోసారి తీవ్రస్థాయికి చేరాయి. ఇరాన్‌తో కాల్పుల విరమణ ఒప్పందం అమల్లో ఉన్నప్పటికీ, అమెరికా సైన్యం ఇరాన్‌లోని ఓ కీలక సైనిక స్థావరంపై ముందస్తు వైమానిక దాడులు నిర్వహించింది. ఈ చర్యతో ఇరు దేశాల మధ్య యుద్ధ వాతావరణం నెలకొంది.

హర్మూజ్ జలసంధిలో అమెరికా దళాలు, వాణిజ్య నౌకలపై ఇరాన్ డ్రోన్లతో దాడులకు ప్లాన్ చేస్తోందన్న ఇంటెలిజెన్స్ సమాచారంతో ఈ చర్య తీసుకున్నట్లు అమెరికా రక్షణ శాఖ తెలిపింది. బందర్ అబ్బాస్ సమీపంలోని మిలిటరీ కంట్రోల్ సైట్‌పై ఈ దాడులు జరిగాయి. దీంతో పాటు, నిఘా కోసం పంపిన నాలుగు ఇరాన్ డ్రోన్లను కూడా విజయవంతంగా కూల్చివేసినట్లు ప్రకటించింది. ఈ దాడులు ఆత్మరక్షణలో భాగమేనని, కాల్పుల విరమణను కాపాడటానికే ఈ చర్య తీసుకున్నామని అమెరికా చెబుతోంది. అయితే, వాషింగ్టన్ ఉద్దేశపూర్వకంగానే శాంతి ఒప్పందాన్ని ఉల్లంఘిస్తోందని ఇరాన్ తీవ్రంగా ఆరోపించింది.

మరోవైపు, అమెరికా అధ్యక్షుడు డొనాల్డ్ ట్రంప్ దౌత్యపరంగా కూడా ఒత్తిడి పెంచుతున్నారు. హర్మూజ్ జలసంధి నిర్వహణపై ఇరాన్-ఒమన్ ప్రతిపాదనను ఆయన తిరస్కరించారు. అంతర్జాతీయ జలమార్గంపై ఏ ఒక్క దేశం ఆధిపత్యాన్ని సహించబోమని స్పష్టం చేశారు. సౌదీ అరేబియా, ఖతార్ వంటి గల్ఫ్ దేశాలు ఇజ్రాయెల్‌తో సంబంధాలు మెరుగుపరుచుకునే ‘అబ్రహం ఒప్పందాల్లో’ చేరాలని ఆయన కోరుతున్నారు.